Уншигчдын бичсэн сэтгэгдэлд hurts.mn хариуцлага хүлээхгүй болно. Манай
сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл
бичихдээ бусдын эрх ашгийг хүндэтгэн үзнэ үү.
Европын холбоо эвслийн 27 орны айл өрх бүрийг дайн, байгалийн гамшгийн үед ашиглах гурван өдрийн иж бүрдлийг гэртээ бэлэн байлгахыг шаардаж байна. Тивд мөргөлдөөн дэгдэх магадлалтай байгаа энэ үед айл өрх, иргэн бүр 72 цаг бие даах чадвартай байх нь чухал. Үүний тулд шүдэнз, ус нэвтэрдэггүй уутанд хийсэн иргэний үнэмлэх, савласан ус, үр тариатай энергийн жигнэмэг, гар чийдэн гэх мэт гол зүйлсээ нөөцлөхийг Европын холбоо уриалж байна.
Украин дахь цэргийн тусгай ажиллагаа удахгүй дэлхийн дайн болж магадгүй гэж Европын удирдагчид мэдэгдэж буй. Тухайлбал, Францын ерөнхийлөгч Эммануэль Макрон өнгөрсөн сард "Оросууд Украин дахь дайныг даяаршуулсан. Бүх зүйлийг дэлхийн хэмжээнд хүргэсэн. Дайн энэ театраар хязгаарлагдах уу? Тийм гэж найдъя" гэжээ.
Скандинавын зарим орон дайны цагт амьд үлдэх гарын авлага тараах замаар бэлтгэлээ хэдийнэ эрчимжүүлээд эхэлжээ. Финландын ерөнхийлөгч асан Саули Ниинисто өнгөрсөн жил Европын иргэний болон цэргийн бэлэн байдлыг бэхжүүлэх тухай уриалж байв. Мөн Норвеги улс иргэддээ нүүлгэн шилжүүлэх сургалт орох, гарын авлагаар хангах зэрэг арга хэмжээ авч байгаа бол Швед улс "Хэрэв хямрал, эсвэл дайн болвол" гэсэн гарчигтай товхимол тараажээ.
Европын холбооны Хямралын менежментийн комиссар Хаджа Лахбиб "Бэлтгэлийн стратегийн нэг хэсэг болгон саналуудыг өнөөдөр албан ёсоор танилцуулна. Аюул учирсан тохиолдолд юу хийхээ мэддэг байх нь сандралаас урьдчилан сэргийлэх арга юм. Цар тахлын эхний өдрүүдэд дэлгүүрийн лангуун дээрх нойлын цааснуудыг хоосолж байснаа санах хэрэгтэй" гэв.
Бэлэн байдлыг хангах нь зөвхөн дайн гэлтгүй цаг агаарын элдэв үзэгдэл, өвчин тахал, кибер аюул заналхийлэл гээд олон зүйлээс урьдчилан сэргийлэх давуу талтай. Иймд эвслийн өрх бүрт гарын авлага илгээхийг уриалж байна.
ЭХ СУРВАЛЖ: DAILY MAIL
