Уншигчдын бичсэн сэтгэгдэлд hurts.mn хариуцлага хүлээхгүй болно. Манай
сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл
бичихдээ бусдын эрх ашгийг хүндэтгэн үзнэ үү.
Шүүхийн шийдвэр гүйцэтгэх ерөнхий газраас цаг үеийн асуудлаар өнөөдөр /2025.04.03/ тайлбар мэдээлэл өглөө.
Өнөөдрийн УИХ-ын нэгдсэн чуулганаар Авилагатай тэмцэх газрын дарга З.Дашдавааг улираан томилох эсэх асуудлыг хэлэлцэх үеэр УИХ-ын гишүүн Б.Энхбаяр: Гэрээс нь 7.3 тэрбум олдсон УБТЗ-ын С.Батдөл Богд уулын амралтын газар ял эдэлж байгаа. С.Батдөлийг амрааж байгаа хүнийг олж шийтгээрэй, З.Дашдаваа дарга аа! хэмээн асуусан. Тэгвэл энэ талаарх мэдээллийг Шүүхийн шийдвэр гүйцэтгэх ерөнхий газраас цаг үеийн асуудлаар /2025.04.03/ тайлбар мэдээлэл өглөө.
ШШГЕГ-ын дарга Б.НАНДИНБОЛОР:
-"Улаанбаатар төмөр зам"-ын Тээвэр зохион байгуулалтын албаны орлогч дарга асан С.Батдөлийг шүүхээс гэм буруутайд тооцож, хорих ял оноосон. 409 дүгээр хорих анги хүмүүсийн мэддэгээр хуучин эмэгтэйчүүдийн хорих ангийн суурин дээр баригдсан тус хорих ангид С.Батдөл хоригдож, ял эдэлж байгаа. Төр хурахын амралтад байсан нь үнэн. Одоо бол зоондоо ял эдэлж байгаа. Хэвлэл мэдээллийнхэн очиж үзсэн ч болно. Хуучин Баянзүрхийн товчоо гараад Ногооны зоорийн дэнжид байдаг хорих ангид С.Батдөл ял эдэлж байна.
С.Батдөл 2023 оны арваннэгдүгээр сард шүүхээр таслагдаж, манай хорих ангийн мэдэлд ирсэн.
2024 оны есдүгээр сарын 29-ний өдөр Төр хурахын амралтын аж ахуй хэсэгт очсон. Яагаад гэвэл хүйтний улирал эхэлсэнтэй холбоотойгоор тус амралтын газар дөрвөн хоригдол галчаар хуваарилагдаж, харуул хамгаалалтын ажилтны үүрэг гүйцэтгэдэг. Тэр бол амралтын газар биш. Манай ахмад, өндөр настнуудыг сувилах алба хаагчдаа амраах чиглэлийн үйл ажиллагаа явуулдаг аж ахуйн тооцоот үйлдвэрийн газар гэж явдаг. Тэнд галчаар ажиллаж байсан нь хуулиар хориглосон зүйл байхгүй. Аль хоригдлыг гаргаж болно. Хуваарилалтын асуудал бол манай байгууллагын тэргүүн дэд даргын ахалсан Хорих ангид ял эдлүүлэх албаны зөвлөлөөр хэлэлцэж шийддэг зүйл. Мөн аж ахуйн хэсэгт гаргахдаа заавал прокурорын зөвшөөрөл авч гаргадаг.
С.Батдөл нэг сар 20 хоног үндсэндээ Төр хурахын амралт сувилалд галчаар ажилласан юм билээ.
50 хоногийн дараа прокурорын тогтоолоор буцаагаад 2024 оны арвнэннэгдүгээр сард хорих анги руу татсан. Одоо бол хорих ангид ялаа эдэлж байгаа.
"УИХ-ЫН ГИШҮҮН Д.ЦОГТБААТАРТАЙ ХОЛБООТОЙ ШИЙТГЭХ ТОГТООЛ АЛБАЖИЖ ИРЭЭГҮЙ"
Д.Цогтбаатарын шүүхийн шийдвэртэй холбоотой шийтгэх тогтоол албажиж ирээгүй. Ирвэл бид холбогдох хуулийн хүрээнд шийдвэр гүйцэтгэх ажиллагааг албадан биелүүлэх үүрэгтэй. Одоогоор ШШГЕГ-т ямар ч бичиг ирээгүй гэсэн үг.
Хорих ял шууд оногдуулсан тохиолдолд цагдаагийн байгууллага шууд ШШГЕГ-т тухайн этгээдийг авч ирж өгдөг.
Шүүх хурлаас гараад л шууд 461 хорих анги руу хүргэж, манайх хүлээж аваад хуулиараа дараагийн давж заалдах шатны шийдвэр гарсны дараагаар хорих ангид хуваарилах үүрэг хүлээдэг.
